Representantforslag om eit nytt Nav for å få fleire i arbeid og aktivitet

Stortinget ber regjeringa greie ut og gjennomføre ei deling av dagens arbeids- og velferdsetat (Nav) i éin pensjons- og trygdeetat og éin arbeids- og aktivitetsetat. Arbeids- og aktivitetsetaten skal ha ansvaret for mellombelse ytingar som dagpengar, tiltakspengar, sjukepengar, arbeidsavklaringspengar og overgang til uføretrygd.

Stortinget ber regjeringa gjennomføre ei tillitsreform der den nye arbeids- og aktivitetsetaten gir statleg tilsette ved Nav-kontora vedtaksmynde i saker som gjeld den mellombelse ytinga arbeidsavklaringspengar (AAP). Overføring av vedtaksmynde til Nav-kontora for andre arbeids- og helserelaterte ytingar må vurderast.

Stortinget ber regjeringa vurdere arbeidsdelinga mellom stat og kommune for å revidere partnarskapsmodellen i Nav, og legge fram eiga sak for Stortinget om dette.

Stortinget ber regjeringa fremje forslag om lovendring i arbeids- og velferdsforvaltningslova slik at Nav får lovfesta internkontroll i eiga og underliggande organ si verksemd for å sikre at lover og forskrifter blir følgde.

Stortinget ber regjeringa endre mandatet til og samansetnaden av det offentlege utvalet som skal revidere folketrygdlova. Utvalet må innan 31. desember 2026 kome med forslag om forenkling av lover og forskrifter som vedkjem dei arbeids- og helserelaterte ytingane. Samansettinga skal justerast slik at utvalet blir sikra representasjon frå brukarorganisasjonane og tillitsvalde sine organisasjonar. Ein føresetnad for forenklingsforslag er at ein samstundes styrkar det økonomiske tryggleiksnettet gjennom betre universelle ordningar for dei mottakarane som har dårlegast inntektssikring. Forenklingar må innebere at formålet med og reglane knytt til utmåling av ytinga framleis er lovfesta og ikkje fastsett i forskrifter.

Stortinget bed regjeringa justere mandatet til ekspertgruppa som skal gjennomgå Nav slik at dei greier ut minst ein modell der dagens arbeids- og velferdsetat blir delt i ein pensjons- og trygdeetat, og ein arbeids- og aktivitetsetat som kan få ansvaret for mellombelse ytingar som dagpengar, tiltakspengar, sjukepengar, arbeidsavklaringspengar og overgang til uføretrygd. Målet med ny organisering er realisering av Nav si kjerneoppgåve med å få folk i arbeid og aktivitet.